मंगळवार, ऑगस्ट ०४, २००९

वाघाचा माज

पावसानं रान माजलंय मस्त मजेत चरा
हिरव्या कोवळ्या गवतानं पोटं चांगली भरा
व्हा तुष्ट आणि पुष्ट आणि गर्वाने उंडरा
आणि शक्तीच्या कैफात होऊ द्या बेसावध नजरा
(म्हणा) "धारदार शिंगांच्या जवळ येण्याची हिंमत होईल काय?"

वाघाचे का कुणि कधि ऐकलेत वाजलेले पाय?

झाडे हिरवी झाडे पिवळी पाने ताजी पाने सुकली
गवत खुरटे गवत लांब बांबू कवळे बांबू खांब
चिखल वाळला चिखल माजला पाणी आटले पाणी फुगले
ऊन भडकले ऊन हरवले दिवस बुडले दिवस उगवले
चट्टे-पट्टे दोन डोळे सतत रोखलेत दिसले काय?

वाघाचे का कुणि कधि ऐकलेत वाजलेले पाय?

वाटा फसव्या वाटा नागमोडी थोडी सपाटी फार झाडी
कुठे दलदल कुठे खड्डे कुठे पोळी कुठे जाळी
कुठे काटे कुठे वारुळे कुठे वेली कुठे बिळे
फळे विषारी फुले विषारी गवत विषारी किडे विषारी
दिवसाचं ठीक आहे, रात्री कुठे घ्याल ठाय?

वाघाचे का कुणि कधि ऐकलेत वाजलेले पाय?

माझे पंजे माझे सुळे माझ्या बळकट स्नायूंचे पिळे
माझी लव माझी मिशी माझ्या अंगावरची नक्षी
माझी पकड माझी ताकत माझी झडप माझी पाळत
माझे तेज माझा रुबाब माझी जरब माझी भीती
जंगलची कोणतीही वाट माझ्याच गुहेशी जाय!

वाघाचे का कुणि कधि ऐकलेत वाजलेले पाय?

-देवेंद्र देशपांडे
४-ऑगस्ट-२००९

लेबल: ,

0 टिप्पण्या:

टिप्पणी पोस्ट करा

याची सदस्यत्व घ्या टिप्पणी पोस्ट करा [Atom]

<< मुख्यपृष्ठ